Þetta er nú aldeilis fín mynd og segir býsna margt um þroska listamannsins sem er rétt að verða 5 ára. (eftir þrjár vikur eða þar um bil).
Í gærmorgun stökk hann á fætur þegar ýtt var við honum og rauk út í glugga og hvað haldiði að Stekkjarstaur hafi komið með??? Þetta fína litabox með vaxlitum.
Litli drengurinn fór glaður og ánægður á leikskólann. Seinna um daginn labbaði hann heim til afa með stóru systur sinni og sagði afa auðvitað frá fínu litunum sem hann fékk í skóinn.
Þá varð afa að orði: " Þá geturðu nú aldeilis málað á veggina heima hjá þér"! Til skýringar verður að geta þess að afi er ákaflega stríðinn og man vel eftir því þegar elsta dóttirin hjólaði ganginn endilangan með lit í annarri hendinni og teiknaði á veggina allt sem henni þótti fallegast.
Litli drengurinn er skynsemdarbarn. Þegar hann kom heim til sín fór hann beina leið inn í stofu með litaboxið og teiknaði þessa fínu mynd af systur sinni á miðjan vegg. Það vantar á hana hárið en það er líklega vegna þess að fyrirmyndin sá til hans.
Mamma hringdi snarlega í afa og skammaði hann svolítið en hann hló svo mikið að heyrðist á næstu bæi. En mamma er enn að velta því fyrir sér hvort það sé hægt að ná þessu listaverki af eða hvort hún eigi bara að slá utan um það ramma og leyfa því að hanga.
Það er ekki á dagskránni að mála veggi, enda erum við lítið fyrir framkvæmdir í desember.
Litli drengurinn ætlar samt ekki að verða listamaður hann ætlar að skrifa bækur þegar hann verður stór eða þegar hann er búinn að læra að lesa.
Ummæli
Skrifa ummæli