Fara í aðalinnihald

Júróvísíón

Sem sérlegur aðdáandi Júróvísíón má ég til með að tjá mig örlítið hér um keppnina í ár. Eins og aðrir sat ég spennt við sjónvarpið í gærkvöldi og horfði opinmynnt á íslenska lagið. Mér hefur nú fundist þetta lag frekar flott og Selma sérlega smart í videóinu í rauða síðpilsinu með bogann en .... Það er bara ekki nóg að vera smart í rauðu það skiptir pínulitlu máli hvernig efnið er klippt niður og saumað saman.
Mér fannst hún vera eins og tíu ára stelpa á náttfötum en konan er bara komin hátt á þrítugsaldur og eins og Páll Óskar sagði einhversstaðar í dag þá er hún með flottar línur og á að sýna það. Heimasætunni varð bara að orði að þetta væri alveg eins og Abbabúningurinn sem hún og vinkona hennar skrýddust á síðustu skólaárshátíð! (hún er ellefu ára nb).

Ég læt þetta nú ekki á mig fá og sest hamingjusöm fyrir framan sjónvarpið annaðkvöld, held bara með Noregi. Nemendur mínir voru sammála um að það væri flottasta lagið í undankeppninni. Við erum að spá í að elda pizzu. Það er alhvít jörð hér í Eyjafjarðasveitinni og JÓH langar ekkert að standa úti með grilltöngina í frosti og snjó.

Það er stundum gott að þjást af frestunaráráttu. Hvernig færi fyrir gulrótunum mínum ef að ég væri búin að sá þeim núna þær myndu bara frjósa í hel...

Ummæli

Skrifa ummæli

Vinsælar færslur af þessu bloggi

Saurbæjarkirkja

Messa í Saurbæjarkirkju í morgun þann 28. október. Alltaf gaman að koma þar, kirkjan hlý og notaleg í morgun og sólin skein inn um austurgluggana sem eru sitthvoru megin við altarið. Saurbæjarkirkja var byggð 1858 og er um margt merkilegt. Hún er stærsta torfkirkjan sem enn stendur á Íslandi og sú einfaldasta að gerð. Þegar Saurbæjarkirkja er reist eru tiltölulega nýbyggðar timburkirkjur í Eyjafirði fram (Grund 1842, Hólum 1853, Möðruvöllum 1848 og Munkaþverá 1844) og því áhugavert að torfkirkja skyldi byggð í Saurbæ og raunar óútskýrt hvort það var eingöngu sérviska staðarhaldara eða hagkvæmni sem réðu þar mestu en kirkjan stendur hátt á hól og fremur vindasamt og timburkirkjunni hættara við foki en þeirri sem hlaðið væri utan með. Enda stendur hún enn og fagnaði 150 ára afmæli fyrir nokkrum árum. (Reyndar standa þrjár af hinum kirkjunum enn þó ein hafi fokið einu sinni, Grundarkirkja var rifin þegar sú sem enn stendur var reist 1905). Myndin af kirkjunni er frá því um aldamóti...
Skrifa ummæli
Lesa meira

28. september 2013

Haustlitir Morgunsólin bræðir héluna af blöðum reynitrésins. Bakvið glittir í heiðan himinn. Fallegri gerast haustdagarnir ekki. Seinna þegar þornað hafði betur og golan gældi við gróðurinn skrjáfaði í laufblöðunum þegar þau féllu til jarðar. 
Skrifa ummæli
Lesa meira

Að henda, eða ... henda ekki.

Í augnablikinu er ég að berjast við tilfinningu sem ég finn alltof, alltof, að því að mér finnst akkúrat núna, sjaldan fyrir. Mér finnst ég vera að drukkna í hlutum sem mig vantar ekki! Vil henda. Frekar óskiljanleg tilfinning í mínu tilfelli því allajafna er ég þekkt fyrir að sanka að mér allskonar dóti og er stolt af því að tilheyra hópi "hrúgukvenna".  Sem þýðir heimilisleg óreiða, en raunar allt á sínum stað. Nú stendur yfir páskahreingerning og ég henti áðan eldhúsáhaldi sem ég á annað eintak af og er strax komin með samviskubit, ég henti líka nokkrum skrúfum (eins gott að JÓH lesi þetta ekki). Myndin er alveg ótengd pistlinum, allsvakaleg súkkulaðikaka sem ég bakaði fyrr í vetur. 
Skrifa ummæli
Lesa meira