Fara í aðalinnihald

Gleðileg Jól

Fjölskyldan Brekkutröð 4 óskar öllum vinum og ættingjum nær og fjær gleði á jólum. Borðið nú á ykkur gat elskurnar og njótið samvista við fjölskyldu og vini. Það er nákvæmlega það sem við ætlum að gera. Takk fyrir allar góðar gjafir og kveðjur. Við hlökkum alltaf til að lesa á jólakortin sem verður eftir mat, pakka og jólamessu. Jólamessan er það sem JG hlakkar næst mest til. "Því það er svo gaman að fara í kirkju á jólunum". (Alveg orðrétt haft eftir)

Myndin er að sjálfsögðu tekin í Jólagarðinum í gærkvöldi. Fjölskyldan ilmandi af skötulykt, nýkomin úr seinni skötuveislu dagsins. Jólatréð beið heima í stofu og krakkarnir búin að velja sér jólakúlur ársins 2006. JG er svolítið lúinn á svipinn en það var ástæða fyrir því, hann komst ekki nema út á bílastæði þegar hann kastaði upp. Hann fær stundum magakveisur ef mikið stendur til og búið að vera óregla á matartímum. Þegar við komum heim fór hann í náttfötin og var hinn sprækasti fljótlega upp úr því.

Nú er aðfangadagur runninn upp. Barnaefnið í sjónvarpinu, allir enn á náttfötunum þó klukkan sé langt gengin í ellefu. Grauturinn er að fara á helluna þegar ég verð búin að blogga. Eftir hádegi fer Jóhann í pakkaferðina með Ingu eða JG með sér. Tvíburarnir fara í göngutúr í nágrenninu með jólakort og ég set upp rauðkálið.

Gleðileg jól

Ummæli

Skrifa ummæli

Vinsælar færslur af þessu bloggi

Saurbæjarkirkja

Messa í Saurbæjarkirkju í morgun þann 28. október. Alltaf gaman að koma þar, kirkjan hlý og notaleg í morgun og sólin skein inn um austurgluggana sem eru sitthvoru megin við altarið. Saurbæjarkirkja var byggð 1858 og er um margt merkilegt. Hún er stærsta torfkirkjan sem enn stendur á Íslandi og sú einfaldasta að gerð. Þegar Saurbæjarkirkja er reist eru tiltölulega nýbyggðar timburkirkjur í Eyjafirði fram (Grund 1842, Hólum 1853, Möðruvöllum 1848 og Munkaþverá 1844) og því áhugavert að torfkirkja skyldi byggð í Saurbæ og raunar óútskýrt hvort það var eingöngu sérviska staðarhaldara eða hagkvæmni sem réðu þar mestu en kirkjan stendur hátt á hól og fremur vindasamt og timburkirkjunni hættara við foki en þeirri sem hlaðið væri utan með. Enda stendur hún enn og fagnaði 150 ára afmæli fyrir nokkrum árum. (Reyndar standa þrjár af hinum kirkjunum enn þó ein hafi fokið einu sinni, Grundarkirkja var rifin þegar sú sem enn stendur var reist 1905). Myndin af kirkjunni er frá því um aldamóti...
Skrifa ummæli
Lesa meira

28. september 2013

Haustlitir Morgunsólin bræðir héluna af blöðum reynitrésins. Bakvið glittir í heiðan himinn. Fallegri gerast haustdagarnir ekki. Seinna þegar þornað hafði betur og golan gældi við gróðurinn skrjáfaði í laufblöðunum þegar þau féllu til jarðar. 
Skrifa ummæli
Lesa meira

Að henda, eða ... henda ekki.

Í augnablikinu er ég að berjast við tilfinningu sem ég finn alltof, alltof, að því að mér finnst akkúrat núna, sjaldan fyrir. Mér finnst ég vera að drukkna í hlutum sem mig vantar ekki! Vil henda. Frekar óskiljanleg tilfinning í mínu tilfelli því allajafna er ég þekkt fyrir að sanka að mér allskonar dóti og er stolt af því að tilheyra hópi "hrúgukvenna".  Sem þýðir heimilisleg óreiða, en raunar allt á sínum stað. Nú stendur yfir páskahreingerning og ég henti áðan eldhúsáhaldi sem ég á annað eintak af og er strax komin með samviskubit, ég henti líka nokkrum skrúfum (eins gott að JÓH lesi þetta ekki). Myndin er alveg ótengd pistlinum, allsvakaleg súkkulaðikaka sem ég bakaði fyrr í vetur. 
Skrifa ummæli
Lesa meira