Fara í aðalinnihald

Sunnanrok

Vaknaði klukkan sex í morgun þegar snjóskóflurnar fóru að fjúka um á auðum sólpallinum. Við drösluðum grillinu (yfirbreiðslan hvarf í fyrrinótt) inn í forstofu í morgun, svona til öryggis.
Ég er yfirleitt ekki veðurhrædd. Líður ágætlega í norðanstórrhríð. En veður eins og í dag er ekki mitt uppáhald.
Minnir mig alltaf á fyrsta veturinn okkar í Laugarborg fyrir 16 árum síðan. Þá var líka nánast snjólaust og sunnanátt(rok) í marga mánuði svona í minningunni. Einu sinni sátum við inni á gangi með allar dyr lokaðar því við héldum að gluggarnir kæmu inn.

Þetta væri nú allt í lagi ef að ég þyrfti ekki endilega að komast í bæinn. Það þarf að fara að gera sig pínulítið fína fyrir blótið svo ég pantaði mér tíma á snyrtistofu og Inga Hildur er að fara í ballett. Við Þorgerður ætlum líka að kaupa í matinn.
Jóhann er á leiðinni frameftir að ná í okkur og ég finn bara hvernig hjartað er farið að berjast alveg uppi í hálsi ég er orðin svo stressuð yfir þessu roki. Bíllinn okkar er líka stór og hár og tekur mikið á sig.

Mér fannst ekkert svo hvasst þegar ég var að labba heim úr vinnuni áðan en það gengur á með hviðum.

Ég verð líklega koma hér aftur við í kvöld og segja frá hvernig kaupstaðarferðin gekk.




Ummæli

Skrifa ummæli

Vinsælar færslur af þessu bloggi

Saurbæjarkirkja

Messa í Saurbæjarkirkju í morgun þann 28. október. Alltaf gaman að koma þar, kirkjan hlý og notaleg í morgun og sólin skein inn um austurgluggana sem eru sitthvoru megin við altarið. Saurbæjarkirkja var byggð 1858 og er um margt merkilegt. Hún er stærsta torfkirkjan sem enn stendur á Íslandi og sú einfaldasta að gerð. Þegar Saurbæjarkirkja er reist eru tiltölulega nýbyggðar timburkirkjur í Eyjafirði fram (Grund 1842, Hólum 1853, Möðruvöllum 1848 og Munkaþverá 1844) og því áhugavert að torfkirkja skyldi byggð í Saurbæ og raunar óútskýrt hvort það var eingöngu sérviska staðarhaldara eða hagkvæmni sem réðu þar mestu en kirkjan stendur hátt á hól og fremur vindasamt og timburkirkjunni hættara við foki en þeirri sem hlaðið væri utan með. Enda stendur hún enn og fagnaði 150 ára afmæli fyrir nokkrum árum. (Reyndar standa þrjár af hinum kirkjunum enn þó ein hafi fokið einu sinni, Grundarkirkja var rifin þegar sú sem enn stendur var reist 1905). Myndin af kirkjunni er frá því um aldamóti...
Skrifa ummæli
Lesa meira

28. september 2013

Haustlitir Morgunsólin bræðir héluna af blöðum reynitrésins. Bakvið glittir í heiðan himinn. Fallegri gerast haustdagarnir ekki. Seinna þegar þornað hafði betur og golan gældi við gróðurinn skrjáfaði í laufblöðunum þegar þau féllu til jarðar. 
Skrifa ummæli
Lesa meira

Að henda, eða ... henda ekki.

Í augnablikinu er ég að berjast við tilfinningu sem ég finn alltof, alltof, að því að mér finnst akkúrat núna, sjaldan fyrir. Mér finnst ég vera að drukkna í hlutum sem mig vantar ekki! Vil henda. Frekar óskiljanleg tilfinning í mínu tilfelli því allajafna er ég þekkt fyrir að sanka að mér allskonar dóti og er stolt af því að tilheyra hópi "hrúgukvenna".  Sem þýðir heimilisleg óreiða, en raunar allt á sínum stað. Nú stendur yfir páskahreingerning og ég henti áðan eldhúsáhaldi sem ég á annað eintak af og er strax komin með samviskubit, ég henti líka nokkrum skrúfum (eins gott að JÓH lesi þetta ekki). Myndin er alveg ótengd pistlinum, allsvakaleg súkkulaðikaka sem ég bakaði fyrr í vetur. 
Skrifa ummæli
Lesa meira