Fara í aðalinnihald

Sólarsamba


Þá getum við Norðlendingar tekið gleði okkar á ný. Sólin er farin að skína og norðangarrinn lætur undan síga. Það er miðvikudagur og verslunarmannahelgin nálgast nú óðfluga. Maður opnar ekki svo útvarp að ekki sé verið að tala um veðurspána og/eða ferðalög og útihátíðir. Það er nú í lagi í dag en þessi umræða byrjaði fyrir hálfum mánuði og er að verða svolítið þreytt, sérstaklega veðurspáin en hún er aldrei óáreiðanlegri en einmitt þessa helgi þegar slæm veðurspá getur hreinlega slegið af heilu hátíðirnar.

Við fjölskyldan förum alltaf í útilegu um verslunarmannahelgina og höfum ekkert verið að flækja málin neitt sérstaklega. Förum bara alltaf á sama stað og höfum gert svo lengi sem börnin okkar muna, ekki skemmir fyrir nú um stundir að við förum að sjá fram á að þurfa ekki að vera mikið oftar í tjaldi í þessari útilegu. Þessi útihátíð er nefnilega haldin í næsta skógarreit við bústaðina okkar á hólnum í dalnum "kæra" Svarfaðardal. (þetta síðasta var nú frekar væmið, en ég er nú búin að láta þau boð út ganga að ég vildi frekar láta raula"Dal einn vænan ég veit..." yfir mér genginni, en "Blessuð sértu sveitin mín....").

Það hafa stundum verið margir með okkur í þessari útilegu og stundum færri og stundum höfum við bara verið eina nótt, það fer bara eftir veðrinu.
Núna verður heldur meira viðhaft en venjulega því Hofsárbóndi er fertugur í dag og ætlar að halda upp á það á laugardagskvöldið í tjaldi heima á hlaði. JÓH og Stebbi færðu honum fyrstu afmælisgjöfina í dag, gashitara til að hlýja gestunum í teitinu.

Myndin er af útsýninu af pallinum hjá okkur í bústaðnum. Er undra þó maður verði fyrir andlegum hughrifum af svona útsýni. Tréð skyggir að vísu aðeins á en það gegnir líka ágætlega hlutverki sóllhlífar og í framtíðinni er á áætlun að nota það sem annað stag fyrir hengirúm!

Svona að lokum þá hjólaði ég með börnunum tveimur sem heima eru til afa og ömmu í morgun. Þar sat ég úti í 30°C (a.m.k.)og kláraði lopapeysuna sem ég er búin að vera að dunda við í allt sumar. Ég áttaði mig allt í einu á því að það gæti verið gott að eiga þessa peysu kláraða um helgina. Ég hafði það af og þvoði hana meira að segja áðan og breiddi út undir handklæði.

Svo bið ég bara um gott veður um helgina. :)

Ummæli

Skrifa ummæli

Vinsælar færslur af þessu bloggi

Saurbæjarkirkja

Messa í Saurbæjarkirkju í morgun þann 28. október. Alltaf gaman að koma þar, kirkjan hlý og notaleg í morgun og sólin skein inn um austurgluggana sem eru sitthvoru megin við altarið. Saurbæjarkirkja var byggð 1858 og er um margt merkilegt. Hún er stærsta torfkirkjan sem enn stendur á Íslandi og sú einfaldasta að gerð. Þegar Saurbæjarkirkja er reist eru tiltölulega nýbyggðar timburkirkjur í Eyjafirði fram (Grund 1842, Hólum 1853, Möðruvöllum 1848 og Munkaþverá 1844) og því áhugavert að torfkirkja skyldi byggð í Saurbæ og raunar óútskýrt hvort það var eingöngu sérviska staðarhaldara eða hagkvæmni sem réðu þar mestu en kirkjan stendur hátt á hól og fremur vindasamt og timburkirkjunni hættara við foki en þeirri sem hlaðið væri utan með. Enda stendur hún enn og fagnaði 150 ára afmæli fyrir nokkrum árum. (Reyndar standa þrjár af hinum kirkjunum enn þó ein hafi fokið einu sinni, Grundarkirkja var rifin þegar sú sem enn stendur var reist 1905). Myndin af kirkjunni er frá því um aldamóti...
Skrifa ummæli
Lesa meira

28. september 2013

Haustlitir Morgunsólin bræðir héluna af blöðum reynitrésins. Bakvið glittir í heiðan himinn. Fallegri gerast haustdagarnir ekki. Seinna þegar þornað hafði betur og golan gældi við gróðurinn skrjáfaði í laufblöðunum þegar þau féllu til jarðar. 
Skrifa ummæli
Lesa meira

Að henda, eða ... henda ekki.

Í augnablikinu er ég að berjast við tilfinningu sem ég finn alltof, alltof, að því að mér finnst akkúrat núna, sjaldan fyrir. Mér finnst ég vera að drukkna í hlutum sem mig vantar ekki! Vil henda. Frekar óskiljanleg tilfinning í mínu tilfelli því allajafna er ég þekkt fyrir að sanka að mér allskonar dóti og er stolt af því að tilheyra hópi "hrúgukvenna".  Sem þýðir heimilisleg óreiða, en raunar allt á sínum stað. Nú stendur yfir páskahreingerning og ég henti áðan eldhúsáhaldi sem ég á annað eintak af og er strax komin með samviskubit, ég henti líka nokkrum skrúfum (eins gott að JÓH lesi þetta ekki). Myndin er alveg ótengd pistlinum, allsvakaleg súkkulaðikaka sem ég bakaði fyrr í vetur. 
Skrifa ummæli
Lesa meira